超齡背包假期之第六天 長野地獄谷野猿公苑/松本

2017年4月30日

今日依然好好天，亦好熱，氣溫接近20度。屋主的同事介紹了一個地方，地獄谷野猿公苑，聽個名，唔係，我都唔識聽，係睇個名“地獄谷”，好似好有探險Feel咁，仲要有野猿，即Monkey，還有張相係的Monkey浸溫泉，好吸引，咁不妨去睇下。

06：30又要晨咁早出發，先要由松本坐火車去長野，06：53開車，約09：45到長野，呢到已坐了兩個鐘9個字有多，中途都要轉一程車。跟住再坐10分鐘巴士，就可以到達“地獄谷”落車站喇。

落車後有個指示牌話你知點行去入口，吓，乜原來未到入口架？指示話要行2km約30分鐘。

除了開初要行一段斜路及末段上一段樓梯之外，其餘都是平路，一般人都沒有問題，但係樓梯級，見到的長者上落時都比較吃力。呢到就諗起。。。又諗起25歲偶像的歌？預了你地會咁諗，今次唔係，係日本有的好奇怪，某的地方不設電梯，如我係立山黑部上去某幾個觀景台，要行足二三層樓梯先到呀，黑部水庫那個仲多梯級，行到上去我都喘晒氣咁。

終於到了入口喇，戲玉到喇，首先是“地獄谷噴泉”

乜咁似香港爆水管咁？
再來“野猴浸溫泉”

只見“馬騮飲水喎”
其他同香港馬騮山好似冇乜分別喎

不過好彩最後正想叫回水走人之際，有一隻馬騮跳了落個溫泉池游水，跟住就有第二隻，第三隻跳埋落去，最後都係三隻，好過冇咁啦。

原來的馬騮識游水，仲會潛水，唔知香港的馬騮識唔識呢？

4日3夜松本之行，終於完了，要轉行去下一站。下一站去邊？繼續跟蹤我吧，嘻嘻。

係時候來個了斷，係來個總結先啱。
松本市位於長野縣內的其中一個城市，人口二十幾萬，面積919km, 細過香港少少，香港1100km,但人口就7百幾萬 （唔知到了777萬未呢），是根據維基講的。相比之下，亦唔怪之得街道上好似死城，成日都冇乜人啦。不過，呢的先好麻，唔會係街上人碰人。

其實景點真正唔多，我覺得只得一個，就是松本城，聽過佢係日本第三出名城堡，但我覺得個個城堡都好似一樣咁。

景點唔多唔緊要，可以去周邊的地方如上高地及地獄谷野猿公苑等。最重要你會覺得住係呢到會好舒服，生活節奏都慢了下來，尤其是我住那間旅館，雖然裡面冇電視，但有人情味呀，佢地好好招呼，可惜我英文唔好，如果唔係可能溝通會多的。另瞓日式Tatami,我覺得比瞓膠囊，碌架床更舒服，雖然會冇咗的私人空間，因為你會同兩三個人同一間房，冇布簾圍住你，我相信的背包客應該喜歡這模式多。

最後，莫非松本就是“火星”？