Chung More: 超齡背包假期之第九天河口湖

2017年5月3日

原先打算一早8點Reception 開檔時去租單車，點知尋晚原來洗衣房收晚上8點，沖完涼發覺收了檔，洗唔到衫，於是今早8點開檔時即刻第一個去洗，但洗乾完都要9點幾。又一個點知，的單車比人租晒，真係要大叫OMG。冇辦法，唯有出去車站租，但會比旅館貴500Yen，貴了50%。

1009 終於可以出發了，目的是環遊河口湖及西湖。按地圖指示，先係河口湖右邊出發，去到某一個位就轉去西湖，環繞西湖一圈後就按原先插入點繼續餘下河口湖的路程，係咪好似好容易呢？一陣就知。

1014 係河口湖入口牌坊

沿著湖踩單車，真係好正，風景一流，有富士山，有湖水，真係名符其實的有山有水。

時間關係，好快已到了去西湖的插入點喇，其實已經是1201，已踩了兩個鐘，當然中間會停下影下相咁，如果唔係邊有咁多料交差比你地睇。
一轉入去那段路，原來是一條大斜路，唯有。。。推上去囉，推到上去頂，點知右轉又是斜路，好似上緊山咁，呢個時候我見到有個家庭，一家三口，父母連一個似5或6歲的仔，佢地向住那個方向踩上去，係踩上去呀，我心諗5，6歲都得，冇理由我唔得，於是我一於繼續。。。推上去。又推到上頂，再見另一轉灣位，見個斜路好似唔完咁，但那家人已不知所踪。唉，冇辦法，我唯有推。。。返落山。呢的叫留得青山在，那怕冇柴燒，知冇。

於是繼續河口湖的環湖遊，踩到去有一處草地，見到好多人好似開緊Party咁，一於停架車去看看，原來是有一個日台文化交流會，佢地係台上表演唱歌，跳舞，好開心，可惜我係呢個Blog upload唔到影片，如果唔係都可以感受下當時的氣氛。