超齡背包假期之第二十一天 札幌

2015年5月15日

好似好耐未跑過 ，今早0630醒了後就起動，今天又凍過尋日，得8度，Feeling係0度，但仍冇阻我既動力，但其實真係好大風，最終我都係...跑了約二十分就返去。

札幌的大通公園，的人講到是十大景點之一，咁當然要去睇下，我住宿的地方距離很近，不用十分鐘就可以步行到那處。

第一個感覺，就係同名古屋近JR站有一個公園好似，所以尋日我話來到札幌就好似去了名古屋一樣。兩個公園都是長方形，中間由馬路分隔開，不過大通就可能多兩格咁，即係長的。另兩個都是常有節目舉辦，如啤酒節，我未去富士山之前，留過一日係名古屋，佢就是正舉辦啤酒節。咁係咪好似呢？不過你可以話個個公園都係做呢的啦。咁我都唔識反駁你喇。

另大通公園感覺真係同一般公園無異，可能在雪際的時期是另一番景象，不過唔係冬天同唔係雪際時，真係是一個普通的公園。

明天開始，大通公園會舉辦拉麵節，由9間鋪頭聯合舉辦，每碗拉麵定價800yen，如我冇理解錯佢張海報的內容的話，記住提我明天去試下。

下午去了另一個十大景點之一，Moere沼公園。呢個公園同大通公園就唔同喇，唔同在佢有單車租，嘻嘻。我是去到先知架，200yen兩個鐘，都好平。我梗係租來踩踩啦。其實除了i踩單車，佢有不同具有藝術的建築物，好似呢的咁。

佢有一個好似金字塔的山坡，你可以行到最高的位置，然後就可以來一個360度旋轉，觀看整個公園，不過今日實在太大風，企都企唔隱，馬步差的都比吹落山，我唔係講笑架，我想來一個360全景拍照都唔得，根本企唔隱，影了幾張後就快快落番下去。

45分鐘左右已踩完一圈，仲有成個鐘先要交車，就踩入內圍地方看看，都仲有個噴水池表演。

今日紀錄，1個鐘45分完成，提早15分鐘交車，因為真係太大風，我都未試過著住件羽絨踩單車。

今日都好筋疲力盡，早早返旅館食飯休息，又要明天先繼續了。

小插曲：尋晚約3 / 4點，我對面床個鬼佬突然間係到唱歌，仲好大聲，我諗都有唱了成分鐘有多，終於我上格個鬼妹就好大聲講了一句，我聽唔懂佢講乜，不過應該是鬧佢，根住就完全收了聲。之後有個工作人員上來睇過，但佢已經冇聲又冇反應，最後就冇事大家繼續瞓覺。佢唔知係咪鬼上身呢?。。。不過我諗應該飲大咗多的，哈哈