呢間酒店真係唔掂，一來冇人識英文，雞同鴨講，即使我出動本世界最偉大的發明 Google Translate， 一樣唔掂。二，負責早餐那位日本女士，簡直好似瘦身男女的鄭秀雯一樣，不過唔係個樣，係身形，問佢借個杯上房用，佢就識做交叉手勢。再問佢可唔可以用多士爐，佢又做交叉手識。三，房租包早餐，但佢個早餐由6點已做好，每一人份放係每一個位上，但如果你唔係6點落去食，咁就凍晒啦。你唔好諗住叫佢整番熱，佢實會交叉你。好彩今晚是最後一晚，明天一早就走人。
來到登別最後一日行程，其實登別只去了一日，其他都是去另外的車站地方。今日又去了一個湖呀，唔單止湖，仲有火山，日本真係多湖多火山。今次呢個叫“洞爺湖”，佢比起我之前去的大沼公園個湖重要大，原本又想踩單車環湖一周，點知呢到我只找到一間單車鋪，要2000yen一日，比大沼公園貴一陪，所以唔租，還掂都踩過兩次全湖遊，今次就試下用我雙腿啦，不過就唔會行晒，只行了1/4左右。
每個湖都總有一個山係對面？
係呢條路個入口，有兩個人看更，心諗咁嚴重，只是山路一條，咁都要看更，原來佢唔只係看更，仲係一個導遊 不過唔會陪你去，只會比張地圖你，解說點樣行。一輪嘴之下，其實我都唔知佢講乜 ，只知佢最後話要行一個鐘。
好，起行喇，沿路都是冇人，冇辦法啦，個個都去晒浸溫泉，一路行一路諗，如果行行下突然火山爆發咁點算呢？我會。。。諗唔到到時再算，你地又會點呢？
條路真係越行越斜，行了半個鐘左右，終於到了火山口，你地之前有冇睇過，我就冇親眼睇過，只係電視見過，咁你地張大隻眼睇清楚喇，各位觀眾，呢個就係火山口喇。
冇錯喇，就係呢個，同你地諗住是否一樣嗎？同我想像的好大落差呀，乜火山口唔係有溶岩嗎？乜唔係有煙噴晒出來，好似昨天我去登別地獄谷咁嗎？點解依家得一個水池咁？我作為一個天文地理一知半解的天文地理學習家，無理由會咁呀，唔怪之得冇人上來睇啦，睇來好似做了傻仔，於是唯有好失望咁行番落山去浸腳吧。
聽朝一早0630要搬家喇，終於可以脫離這個“地獄屋”，聽日去邊？當然梗係聽日再講。
明天繼續，再見。。。
沒有留言:
張貼留言