Chung More: 超齡背包假期之第十二日五陵郭公園函館

2017年5月6日

0625 早安 Ohayōgozaimasu 來了日本咁多日，唔多唔少都要講下幾...隻字的日文，扮下日本仔，話時話，的日本人成日都覺得我係日本人，Honto真的嗎?

函館的清晨同松本差不多，都是冇人。

今早又要消除呢幾日累積的脂肪

日本早上多處地方都會有的野出現，除了新宿我仲未見過之外，其他地方每朝都有。咁猛？晨早都會出來？係呀，好生猛呀，仲會叫，呀呀聲，就是烏鴉，係街上除時有十幾隻聚集（題外話：係香港兩個人都被告非法集會），一有人車就會散開，函館都一樣有。上次係英國芬蘭都冇，點解日本會特別多？

報下天氣先，今日早上天陰多雲仲要有雨，來了多日，都是得二日有落過雨，真係要多謝天公（唔係阿公呀）。

今日會去函館唔知係第一定第二大景點，個個都會去，五陵郭公園。呢個公園主要特色是，一佢係五角型，二裡面種滿晒櫻花，北海道今年櫻花花得最靚就係5月頭呢幾日，根據官方網站講，唔係我吹架。

未去之前，路過函館朝市，呢個又係景點之一，我家姐早幾日已叫我去試下的海膽同長腳蟹喎，其實我又唔好大興趣食呢的，不過來到就入去打下卡啦。入到去，嘩，街道上就好似死城冇乜人，呢到就迫滿人，仲要排長龍等食。有相為證，不妨睇下。

真係咁好食？我成日覺得即使好多人排隊都唔一定好，個個都當打卡咁。食神話齋，唔係大聲就好戲，咁我就話唔係人多就好食。

唔理佢住，去番五陵郭先，果然官網冇講錯，我亦都冇來錯，真係好多好靚櫻花，仲要圍住個五角型種，好特別。不過有好多櫻花已經落晒地上，最初都以為睇唔到櫻花落的景象，後來一陣怪風，將一兩棵的櫻花如雨般散落，但好快又停了，於是又要企定定係到，再等下一陣風，如此類推，等下，企下，影下，做了幾Round就收工。