今早天氣回暖了，約14度，最重要風細了，冇風就冇咁凍，出門口時天陰，預計遲些都會落雨。
今日又去十大景點之一，北海道開拓之村，顧名思義是展示日本歷史建築，主要是話於日本明治及大正時期（即19世紀中，20世紀初）的建築物按照原型復原出來。
睇了兩日公園，今日睇下的歷史文物，都冇咁悶呀。入場費成人800yen，好彩我又有得免費入場，根據佢指南裡面有52間建築物，如有的是新聞館，醫療室，郵局，髮型屋，住宅，魚村等，各俱等式，有些屋還有真人講解，可惜我唔識聽。
尋日講了大通公園今日開始有個拉麵節，咁難得撞到就一定去睇之餘仲食啦，佢分二期舉行，每次有9間拉麵鋪參與，一律800yen一碗，我約下午6點幾去到，眼見唔係好多人，目測約一百左右，可能本地人都食到厭，冇興趣，其實佢又唔係平好多，亦唔會話有乜特色拉麵同佢地鋪平時賣的不同，本地人來都是聯誼性質多，明天開始係隔離亦有個啤酒節，我諗呢個可能會多人的，不過我就冇得參加喇，因為明天要離開札幌了，又去邊，咪又係聽日話你知囉。
另加插幾張大通公園夜景比大家睇下
大發現：我住薄野Susukino地鐵車站附近，地鐵站有一條地下街，原來呢條地下街灌通通兩個地鐵車站，大通Odori 同札幌Sapporo，甚至可到JR 札幌，非常之長，我計過由薄野到札幌地鐵約30分鐘，到JR札幌加多5分鐘。沿途除了有店鋪之外，都有的休息地方，打風落雨真係冇有怕，香港其實要諗下呢的地下街去疏道地面擠迫的情況啦。
小插曲：係洞爺湖時撞到一對星加玻情侶，估唔到係拉麵節又撞到佢地，世界真係細，佢地話明天離開札幌返星加玻，我話我都係不過就去第二到，有緣再見。
明天繼續。。。
沒有留言:
張貼留言