超齡背包假期之第十天 河口湖 / 新宿

2017年5月4日

今日仲有半日時間於河口湖附近遊玩，尋晚上網睇下有乜地方好去，發現了富士山原來有地方叫五合目，有一條行山路線，可以近距離見到富士山，好，於是就確定去行一趟。

0825去到河口湖的巴士站買票，都好貴下，來回都要2100Yen，冇辦法啦，都要比。0850開車，一個鐘就到了五合目，落車後又是到處都是人。原來五合目已經是富士山的山腰，有2305M高，富士山的山頂都好似3千幾米，呢到同立山的室堂差不多高，仲有呢到還可以看到立山幾個山峯添。

立山

好近距離的富士山，真係好似自己已經登上巔峰咁。

係呢到打完卡後，就準備去行那條路線，點知原來封了，要7月1日先開山，噢，點會咁架，都冇辦法，唯有行下幾間購物鋪，唔駛一個鐘已經行完，只好等下班車回程，2100yen就只可消費兩個鐘而已。

咁唯有影多幾張相補數。

三日二夜的河口湖又完了，今次只去得一個湖，比預期有落差，但亦都可以完成單車遊一圈，都總算達標。

話咁快今日是第十日，歡樂時光好快過，又係時候講拜拜，返香港？嘻嘻 ，未住 只係拜拜富士山，今晚要去新宿暫借一宵，因為明天一早要去北海道Hokkaido，咁就Hokkai~do見喇。

補充：今晚果間膠囊酒店，真係膠到唔膠，成間房是膠做，所以就好焗。同埋呢到好似迷你倉咁，成間迷宮一樣，一層可能有百戶，心諗若有火警都唔駛指意走得出，咁危險的設計，日本冇發生過事故嗎？政府唔會監管嗎？下次真係唔好Book呢的地方住，試過一次就夠。