超齡背包假期之第五天 松本 2.0

2017年4月29日

0655 今日踩單車之前來過熱身先，順便留下我珍貴的腳毛。

清晨的松本，街道上都是沒有太多人，感覺舒服寧靜。

0900 今天雖然沒有離開松本這個城市，但是活動仍然繁忙，首先我租借了一架單車，原來松本是有免費借單車服務，仲可以玩成日，朝9晚5，又唔駛按金，只要填一張表格就可。

松本市都好鼓勵人踩單車，我係幾條街都見有單車停車場，規模同汽車有得比，仲要有上下層，裡面泊了唔少單車，我見門口寫住有月租添呀。不過係街上其實又唔多單車係到踩緊，可能唔係繁忙時間掛。

行人道的設計同日本好多城市都一樣，劃分了一面比單車行的，不過我見的人兩面都有踩過。除了係火車站，一般都是冇乜人，真係小貓三四隻，同之前我去鹿兒島有的似。所以就可以好輕鬆咁踩住周圍去 ，而馬路上亦唔多車，同埋佢地的車速好慢，其實唔知呢的叫慢或是正常，只係香港個個都是賽車手。

9：00 一開始第一個就借了架單車，為了熟習街道，先去幾條街之隔的松本城 ，亦因為今日第二個活動，約了屋主同其他住客去睇槍Show，佢地話是一年一度的什麼“古流炮。。。”展咁，詳情可睇張圖的海報。

11：00 一個司儀出來，先講一輪說話，當然我唔會知佢講乜啦，跟住就來正式表演。先來一個人 攞住支真係好舊式的長槍，仲要用支野擦下槍管，睇怕似二戰時期的產品，跟住司儀一聲號令，Bomb一聲，好嚮好震撼，跟住仲勁，連續幾個人一齊發射。轟隆轟隆，耳膜都差的比佢震聾。如此類推，就表演了接近一個鐘便完，如想睇就要明年喇。

睇完就繼續我的單車之旅，暢遊這個城市。

花時計公園

松本城的日與夜

時計博物館

開智小學校舍

呢個唔係景點，只係得意影下來

16：00 見到個天突然黑晒又多雲，似係將會落雨，即刻踩返去交車，交完車幾分鐘果然落雨，不過落了幾分鐘後又停了。

今晚最後一晚，返到屋又見到一位新室友，今次終於唔係鬼，係泰國人，不過佢的英文好得，好流利。明天又有新行程，我的原先計劃又被人推番了。乜行情咁特別，明天再講啦。

今日完，明天繼續。。。

超齡背包假期之第四天 上高地/松本

2017年4月28日

今天要去的地方都是我計劃行程的其中一個重點地方，其實之前我都未聽過這地方，只因上網找資料時，無意發現，見人地寫地好似世外桃源一樣，一講起世外桃源，又立即想起我25歲偶像的一首歌，同名是“世外桃源”，「我的心已跟海風流浪，我的影同樣尋覓去向，如海風。。。啦啦啦」，嘻嘻，唔記得。所以就要來看一看。

去“上高地”，可以在松本車站搭巴士直接去到或坐火車到“新島島”，再轉巴士入去。一般都是於“大正池”落車，然後向“河童橋”行去，再回去巴士總站回程。如有時間可以行多3.3km 去“明月池”，但來回就變了6.6km, 所以冇乜人會行去。

9：40 去到“大正池”，第一樣個個都要做？就是先去洗手間 ，我見個個一落車就即刻去，咁我都唔例外一於跟隊。

解決完，就落去會見到一條河，河背後有幾座山，山頂仍鋪滿雪，我懷疑是立山黑部那幾座山。這裡是第一個打卡位，我都唔錯過，影多幾張相先。

沿“大正池”，可以一路行去“河童橋”，但地下仍然鋪滿雪，所以行路要小心的。想信遲些冇晒雪後變回草地，咁就會行得暢順好多。

12：00終於到了“河童橋” ，都行了成兩個鐘，呢個明顯多了很多人，大部份都是旅行團，佢地唔需要行就直接坐車到呢到。其實我覺得最靚影相位唔係呢條橋，而是橋旁邊有個位置面向山脈，而下面亦有條河，河邊長滿蘆葦，知唔知係邊？唔知唔梗要，到時你來便會找到。

到了此，基本上已行完，如想繼續其實可以再行到更遠的地方，但去了就要行回來巴士總站走，一來一回起碼要行多幾個鐘，今日夠了，下次有機會先再行吧。

上回講到間旅館點解全部都是外國人？點解咁熱情招待？呢的一個一個疑問，終於解開了，問題就是我問題囉，小人之心囉，其實屋主Brain 同佢兩個同事真係好好人，佢會比意見你，如原先我打算去阿智村即日來回，佢地會唔建議我去，因為路程好遠難即日來回，佢地又會建議或比資料你，今晚回到去時，佢又邀請我同佢地一齊睇卡通片，雖然我唔知講乜，但都一齊睇了幾個字，然後返房瞓，因為今日已行了太多路。

驚喜：之前我係富山住宿時有個德國人室友，今日佢竟然又來了呢到，世界果然係好細。

超齡背包假期之第三天 立山黑部/松本

2017年4月27日

尋日成日都落雨，估唔到今日出太陽，真係多謝天公（唔係阿公），今日5點半就已起身，早的出發去立山黑部，驚遲的會太多人，因為個個都來睇開山。

7：06 成個立山行程需要坐8架交通公車，首先就要係富山坐電車到立山，依家已經好多人排緊隊。

尋日原先打算在立山黑部每一個站作即時描述，但原來唔係隨處都收到4G訊號，同加上實在太多人，你想找一個位坐下來都難，所以第二日才補述。

之前講過，立山黑部要坐8架交通公具，
1. 富山 去 立山，坐富山地方鈇道
2. 立山 去 美女平，坐立山登山纜車
3. 美女平 去 室堂， 坐立山高原巴士
4. 室堂 去 大觀峰， 坐立山隧道無軌電車
5. 大觀峰 去 黑部平 坐立山架空索道吊車
6. 黑部平 去 黑部水庫 坐黑部登山纜車
7. 黑部水庫 去 扇澤，坐關電隧!無軌電車
8. 扇澤 去 信濃大町 坐巴士

其實整個行程有些似走馬看花，基本上每種交通是一接一，要轉乖的時間唔多，一般都是十幾分鐘，你就要把握這段時間睇完這個位置的景點，雖然你是可以選擇下一班車，但人就會積眾越來越多，所以其實最好都是住一晚係山上，咁你就可以有充分時間，仲可以睇日落再加一個日出，但代價就是金錢，因為住宿貴。

我差不多用了9小時就行完整路線，係黑部水庫可以留耐的，因為那處比較少人而主霸路面又闊的。

完全了今次旅程比較重要的景點，又要馬不停蹄去今晚的住宿，今晚唔瞓籠屋，唔瞓碌架床，就是瞓塔塔米，即日式地墊。

當我入到呢間旅館，發現屋主原來唔係日本人，而係一個外國人，佢仲有兩個幫手都是外國人，而住客都是外國人，只得我一個是華人，心即時想我是否去錯地方呢，如果唔係點解我會找到呢到呢？

當一切問題都未解決，屋主Brian就好熱情招呼我，仲攞張地圖介紹我這裡的景點。又來一問題，咁好招呼？有冇事呢？我仲住這裡三晚添。

事情發展到咁，會點呢？
今日講住咁多先，明日繼續。。。

超齡背包假期之第二天 富山

2017年4月26日 19-13度 有小雨
  今早6點已醒了，尋晚竟然冇起身去廁所，嘻嘻，可以話一覺瞓到天光，其實係咪天光都唔知，因為呢到冇窗。

  尋晚來到名古屋站因為已過了7點，所以換唔到張JR pass, 於是諗住早的落街睇下有冇得換同搵早餐食，落到樓下時，今早氣溫15度，感覺清涼但唔凍，我著一件短袖加件外套已足夠，去到車站發現原來都要10：00先開工，咁唯有周圍行下。JR站一早就已經有好多人趕住返工，但行到的橫街就相對少人，同埋佢地大多地方都有得比你泊單車，相對香港就落後好多。

  第一餐的早餐，食呢的，呢的係咪窮遊假期的膳食？ 領隊，我要轉團。嘻嘻，唔記得個領隊就是我囉。

  10：06 終於換到個Pass，準備出發到Toyama富山，車程都要4個鐘，咁拜拜名古屋，富山見喇。

14：45，終於到了富山，今日天氣唔好，整日都落雨，好彩都唔算大，唯有冒著雨背著我10kg的行李去我下一個住宿。今晚唔住籠屋，而係住碌架床 ，呢間是一間民宿，一間日式的木屋，裡面有幾間房，有日式房間塔塔米，我那間是放了兩張碌架床，由於我第二個人到，所以我有得選，我選了下面。

呢種住宿模式同尋日的籠屋好唔同，籠屋就好多人有自己的空間，呢到好少人，住滿都是十幾人，自己空間就只得2呎半x6呎。我房間住了一個德國人，一個台灣人，還有一個唔知乜人，因為佢一早已上床瞓了。我就同那兩個人係廚房的食飯枱位置係到傾計，又要出動我那唔咸唔淡的英文同普通話，條脷好唔得閒，嘻嘻。

其實大家住係度都是為了一個目的，就是明天的立山黑部，咁就明天再見喇。

今日完，明天待續。。。

超齡背包假期之第一天 名古屋

2017年4月25日
  從網絡上都見有好多人獨自一個背包旅行，不論獨男或獨女，佢地大多都好享受 不論當中遇上什麼困難，都認為是一種難忘的體驗。作為我一個超齡IT男，當然都想去體驗一下呢種新的體驗，新的挑戰。多謝老婆批准我這次旅行，《超齡背包假期》正式開始。

  我會打算不定時會更新呢個Blog，至於去幾多日？有興趣的朋友就每日《跟蹤》啦！

  其實未去已經有一難題，手提行李上限是7kg,我執極都要8kg,仲未計部相機，加埋都有10kg，即使話未來的日子我都要背住10kg行路。唔知會唔會好辛苦呢？不過我相信，我做得到的，正如我的25歲偶像唱的一首歌一樣，（我做得到），唔好意思，又要Hard Sale一下，嘻嘻。

  依家正係香港機場等上機，我的第一站是日本名古屋，我來也。

小事一則，剛才係香港過關行李檢查時，個關員見到我著住件“曼聯”衫，佢話“曼聯喎”。上次我去倫敦，落機時個鬼佬機長係門口見到我，就指住我心口， said"Manchester", 點解的人好似好奇怪咁，其實好多人都著啦，定只係打招呼的方式一種？

坐了成4個鐘飛機，終於日木時間下午6：10到達，之前來過日本幾次，都是冬季，都是5點幾已開始太陽下山，今次終於可以冇咁早就天黑。一出機倉門，就開始已經有一種熟悉的感覺，因為之前都來過這裡，上次是去高山，白川鄉等地方。

  第一晚我會住宿於名古屋，只是屬於駁腳借宿一宵，因為明天便要去更遠的地方。你估我會住什麼地方？今次是《窮遊假期》，冇酒店住，只有住呢的，就係住日本的「籠屋」。

同香港依家的籠屋比，間隔差不多，但睇落就好似潔淨企理些，我住係上層，上到去感覺比我想像中好，其實唔太細，都有4x6呎空間，同瞓一張雙人床冇分別，另裡面有電視及閘萬，後來仲發現有部電腦添，真係麻雀雖小，五臟俱全，呢的香港籠屋都冇。你估一晚房間幾錢，佢位於名古屋JR車站對面，步行不需要5分鐘。一晚只需要港幣132元，我覺得超值啦。

我係香港都未試過住呢種模式的地方，開初會驚唔好瞓，網上的人成日講會太嘈，但嚴格來講我又唔覺得太嘈，冇錯，你是會聽到的人出入聲，會聽到隔離床位瞓覺時的鼻寒聲，但呢的就是住係呢到的特色麻。整體來講，呢間我覺得好，如5分滿分，我會比4分。

補充：呢間旅館於搭電梯上房前要除鞋放於鞋櫃

今日完，明天繼續。。。